München-ulukka
München-ulukka var ei flyulukke i 1958 der 23 menneske mista livet, mellom anna åtte spelarar frå det engelske fotballaget Manchester United. 21 menneske omkom i sjølve flystyrten, medan to andre døydde seinare av skadane dei hadde fått.
6. februar 1958 var Manchester United på veg tilbake til England med fly etter å ha spelt kvartfinale i Europacupen i Beograd dagen før, mot Crvena Zvezda (Raude Stjerne). I tillegg til spelarane på laget og trenarteamet, var òg ei rekke engelske sportsjournalistar mellom passasjerane. Flyet landa i München for å fylle bensin og då flyet skulle ta av igjen i tett snøvêr, gjekk flyet i bakken. 21 av de 44 passasjerane og mannskapet mista livet i styrten.
Av dei omkomne var kapteinen på laget Roger Byrne og storscoraren Tommy Taylor. Den 21 år gamle stjernespelaren Duncan Edwards overlevde styrten, men fekk omfattande skadar og døydde 15 dagar seinare. Manageren til laget, Matt Busby, vart òg hardt skadd, men overlevde.
Av dei overlevande var Bobby Charlton og keeper Harry Gregg, som berre fekk lettare skadar og klarte å redde fleire menneske frå det brennande flyvraket.
I tillegg til dei åtte omkomne, vart to andre spelarar – Jackie Blanchflower og Johnny Berry – så hardt skadde at dei aldri kom tilbake på fotballbanen. Berry svevde lenge mellom liv og død med store hovudskadar og fekk den siste olje da han kom til sjukehuset.
Omkomne spelarar
- Geoff Bent, venstreback
- Roger Byrne, venstreback og kaptein
- Eddie Colman, midtbane
- Duncan Edwards, midtbane
- Mark Jones, midtstoppar
- David Pegg, venstreving
- Tommy Taylor, spiss
- Liam Whelan, offensiv midtbane
Overlevande spelarar
- Johnny Berry, høgreving
- Jackie Blanchflower, midtstoppar
- Bobby Charlton, offensiv midtbane
- Bill Foulkes, høyreback
- Harry Gregg, keeper
- Ken Morgans, høgreving
- Albert Scanlon, venstreving
- Dennis Viollet, spiss
- Ray Wood, keeper
Bakgrunnsstoff
[endre | endre wikiteksten]- Ei side til minne om dei involverte i München-tragedien
- Aviation Safety Network. Ulukkesrapport Arkivert 2008-02-12 ved Wayback Machine.
Kjelder
[endre | endre wikiteksten]- Denne artikkelen bygger på «München-ulykken» frå Wikipedia på bokmål, den 4. november 2008.