Banko Sentral di Kòrsou i Sint Maarten
Fecha di fundashon òf kreashon | 6 febrüari 1828 |
---|---|
Nomber ofisial | Centrale Bank van Curacao en Sint Maarten |
Presidente | Emsley Tromo |
Pais | Kòrsou, Sint Maarten |
Moneda | Florin Antiano |
Sede | Willemstad, Philipsburg |
Wèpsait ofisial | http://www.centralbank.cw/ |
Banko Sentral di Kòrsou i Sint Maarten ta e banko sentral di e paisnan Kòrsou i Sint Maarten. Desde e reforma konstitushonal di Antia Hulandes e ta e susesor di e Banko Sentral di Antias Hulandes (BNA). BNA tabata e banko sentral di pais Antia konsistiendo di e 6 islanan Aruba, Kòrsou, Boneiru, Sint Maarten, Saba i Sint Eustatius. Na 1986 Aruba a lanta Banko Sentral di Aruba despues di bandona e konstelashon antiano. Desde 2010 e banko ta wòrdu yamá Banko Sentral di Kòrsou i Sint Maarten. E ta e banko sentral mas bieu di kontinente Amérika ku ta eksisti ainda.
Historia
[editá | editá fuente]No por separá e historia di e banko aki for di e historia di e 5 islanan i nan historia bankario.
Na kuminsamentu di siglo 19 Kòrsou i e otro kolonianan Hulandes, manera Aruba i Boneiru no tabata importante ekonómikamente. Ku eksepshon di produktonan, manera salu i palu, e islanan mester a importá tur kos. Tabatin un tempu ku a deskubrí oro na Aruba, pero esei tampoko no tabata di importansia. West Indische Compagnie no por a saka probecho finansiero for di e esaki.
Kòrsou a fungi komo lugá di enkuentro pa kambia materia prima ku tabata bini for di Latino Amerika i Karibe, kual tabata destiná pa Oropa. E oropeonan, di otro un banda, tabata kambia nan produktonan ku e merkansianan di e paisnan di Latino Amerika i Kòrsou. Konsekuentemente, diferente plaka ekstranhero tabata sirkulá riba e isla. E monedanan ku tabata usa e tempu ei tabata dòler spañó, “Golden Joe” i diferente otro monedanan franses i alemán. E komersiantenan tabata kambia e monedanan di oro i plata aki pa merkansia den e asina yamá “Trade Houses”. Komo ku Kòrsou tabata importá mas ku e tabata eksportá, regularmente tabatin un defisit na moneda. Pa por a tòg kambia sèn, nan tabata parti e monedanan den 4 òf 5 pida. Por ehèmpel e dòler spañó tabata wòrdu partí den 4 i kada pida kòrta tabata haña un stèmpel di un strea riba dje. Nan a yama e pidanan kòrta ei “Guillotines”, kual awe nos konosé komo yotin kòrta .
Komersiantenan tabata hasi mal uso di e defisit di moneda dor di spekulá. Nan tabata traha nan mes papel di plaka i laga esakinan sirkulá riba e isla. E situashon finansiero a bira kaotiko riba e isla. E situashon aki tabata molestiá rei Willem I, ku tabatin e soño di hasi Kòrsou un sentro di kambio entre Reino Hulandes i Amerika.
Fundashon
[editá | editá fuente]Na aña 1826 rei Willem I a bin ku e proposishon pa lanta un banko pa organisá e asuntunan finansiero di e isla. Dos aña despues, 6 di febrüari 1828, e banko, Curaçaosche Bank, a keda establesé dor di Johannes van den Bosch (1780-1844), representante di rei. E banko tabata situá den e “Garrison Fort of the West Indian Company”, konosí komo Fort Amsterdam, kaminda ku e gobièrnu sentral ta sintá. Nan a apuntá tres saserdote pa atministrá e banko.
E meta di e banko tabata pa promové komèrsio den kolonia Kòrsou i Dependensianan dor di fia plaka na komersiantenan. Banda di esei e banko a fungi tambe komo e kaha di plaka di gobièrnu, dor di hasi pagonan na sektor privá na nòmber di gobièrnu.
E banko tabata popularmente konosí komo “Bank van Leening” of banko di kredito.
Funshon
[editá | editá fuente]E meta prinsipal di Banko Sentral ta pa mantené e stabilidat di e moneda antiano, florin, i pa promové e sistema finansiero di Antias. Pa realisá e metanan aki, Banko Sentral, esun ku ta supervisá, frekuentemente ta kontrolá bankonan i otro institutonan finansiero.
E funshonnan di e banko ta lo siguiente:
- Banko Sentral ta e uniko instituto ku tin e fakultat dor di lei pa emití plaka “bankbiljetten”. E ta enkargá tambe ku sirkulashon di moneda.
- E ta supervisá tur instituto finansiero pa protehá esnan ku tin plaka na e institutonan aki
- E ta manehá e reserva Forex[1] di Antias Hulandes
- E ta tesorero di gobièrnu
Lista di Presidente
[editá | editá fuente]P. Timmermans, 1981-1986
Vimy Servage, 1986-1991
Emsley Tromp, 1991-2017
Richard Doornbosch, 2020-presente
Link Eksterno
[editá | editá fuente]- Banko Sentral di Antias Hulandes