Booshi Wever
Pais di nashonalidat | Reino Hulandes |
---|---|
Fecha di nasementu | 6 febrüari 1954 |
Okupashon | politiko |
Candelario Ambrosio (Booshi) Sixto Dionicio Wever (☆ 6 di februari 1954 na Aruba) ta un politico Arubano y fundado di e partido Union Patriotico Progresista (UPP). E tabata minister di Salubridad Publico y Medio Ambiente di Aruba (2001-2009). Prome di esey e tabata minister plenipotenciario (1993-1994) na Den Haag.
Biografia
[editá | editá fuente]Na 1981 Wever a logra su examen di candidato di derecho na Universidad di Antia Hulandes (UNA) y despues a bay traha na e departamento di Ley y Asuntonan Constitucional.[1] El a completa su estudio na Universidad di Nijmegen specialisando den derecho internacional, derecho constitucional y derecho di organisacionnan internacional.
Wever a cuminsa su carera politico na Movimiento Electoral di Pueblo (MEP). Den e eleccionnan entre 1983 y 2009 el a aparece riba lista di MEP; na 1983 pa miembro di conseho insular y despues parlamento di Aruba.[2] Como candidato nobo na 1983, el a logra 544 voto personal na puesto 19.[2] E tabata parlamentario di 1989 te 1993, 1994 te 2001 y 2009 te 2013. El a fungi tambe como presidente di parlamento entre januari y juni 1998. Na 2011 el a wordo nombra lider di fraccion pa MEP. Despues di bandona e fraccion dia 27 di juli 2011, el a caba su termino como parlamentario independiente.[3]
Como politico, Wever no ta un persona sin controversia; entre otro, el a haya su mes den scandal pa motibo di falsificacion di diploma, su comportacion inconvencional y declaracionnan spantoso paden i pafo di parlamento. Ademas e tabatin varios enfrentamento cu un periodista.
Entre 2 di maart 1993 te 1 di september 1994 Wever tabata minister plenipotenciario di Aruba na Hulanda, unda, banda di su actividadnan oficial regular, e tabata ocupa cu e reforma estatal manera e scrapmento di artíkulo 62 di Statuut y dunamento di mas contenido na su gabinete den Comunidad Economico Europeo.[4] Despues el a wordo nombra como minister di Salubridad Publico y Medio Ambiente, puesto cu el a yena desde 30 di october 2001 te 29 di october 2009 den e gabinetenan Oduber III y IV.
Na 2013 Wever a funda Union Patriotico Progresista (UPP) y tabata lider di partido entre 2013 y 2021. Apesar cu UPP no a logra representacion den parlamento na eleccion 2013, 2017 y 2021, Wever a keda activo como politico pafo di parlamento y vocero di UPP.
Na 1995 Wever a wordo condecora como Cabayero (ridder) den Orden di Leon Hulandes.[5]
Fuente, nota i/òf referensia
|