Мюнхенска догварька
одлѣва: Чемберлен, Даладье, Гитлер, Муссолини, Чиано
Мюнхенска догварька (30. септембер 1938), договорѣня, котре досягли Германия, Велика Британия, Франция ай Италия, жебы дозволити нѣмецку анексию Судетской области на западѣ Чехословакии.[1][2]
История подписаня
[едітовати | едітовати жрідло]По анексии Австрии в марцу 1938 Адолф Гитлер и его генералы выступили з ворохобныма проголошѣнями в адрес Чехословакии, де понад три милионы обывательох Судетской области были етничны Нѣмцѣ.[1]
Нѣмцѣ в Чехословакии мали право на образованя по нѣмецкы, мали властны политичны партии. Чехословакия мала силне войско, а на граници з Германиев могутны военны фортификации, од року 1935 мала гарантии безпекы од СССР и Франции, подля котрых могла просити военну помочь од СССР, кедь таку помочь дасть и Франция.[2]
Але французскы дипломаты и експерты, як тыж их британскы колегы выступали з думками, же их сторона не мала бы вступати до войны з такой причины, котру мож одстранити на принципѣ самоопредѣлѣня народох и поважовали за рѣшѣня плебисцит в Судетской области. Они даколько разы мали конзултации з нѣмецков сторонов. На конець септембра ся спор заострив и была выголошена мобилизация в Чехословакии и Франции. В такой ситуации, усилуючи ся в послѣдню минуту обминути войну, британскый премьер Чемберлен понукнув неодкладно скликати конференцию четырьох держав на урегулованя спора. Гитлер пристав, и 29. септембра Гитлер, Чемберлен, Даладье и Муссолини зыйшли ся в Мюнхенѣ. Муссолини подав написаный план, котрый быв вшиткыма приятый як Мюнхенска догварька. По роках было выявлене, же тзв. «италианскый план» быв приготовленый в министерствѣ загранича Германии.[1]
Чехословацкых делегатох на конференцию не допустили. Они были закликаны по подписаню, по полуночи 30. септембра, жебы ся дознали, о чом ся договорили четыри стороны. Представителѣ Франции и Великой Британии рекомендовали Чехословакии прияти догварьку и тогды гарантовали, же далшых змѣн границь они не допустять; в иншом припадѣ она мала зостати перед агресором сама. Чехословацка сторона Мюнхенску догварьку прияла.[2]
Условия догварькы
[едітовати | едітовати жрідло]Подля документа, Чехословакия в добѣ од 1. по 10. октобра повиновала ся оддати Германии районы с векшинов нѣмецкого обывательства. Была уложена можность вымѣны обывательства меджи двома сторонами. В дакотрых спорных районах в часѣ до полурока мав быти плебисцит под дозором меджинародной комисии (четырьох подписантох). Чехословакия тыж мала в границях трьох мѣсяци рѣшити вопрос з польсков и мадярсков меншинами — в иншом припадѣ тот вопрос мали рѣшити четыри подписанты.[2]
Наслѣдкы
[едітовати | едітовати жрідло]Од 1. октобра Германия ввела войско в Судетску, а Польща — в Чешинску область. 2. новембра подля рѣшѣня Первой вѣденьской арбитражи Мадярщина заняла южну Словакию. Чехословакия стратила понад третину територии и обывательства, около 40% промыслового потенциала и могутны военны фортификации вздовж старой нѣмецкой границѣ. В Чехословакии наростали одсередны тенденции. 7.–8. октобра 1938 пражска влада дала широку автономию Словакии и Подкарпатской Руси. Держава достала назву Чехо-Словакия, або Друга Чехо-Словацка република. Она пробыла до 14. марца 1939, коли водителѣ словацкой автономии по навщѣвѣ Берлина выгласили независимость Словацкого штату. 15. марца 1939 германска армада заняла зосталу часть Чехии, на другый день на ей територии створили Протекторат Богемия и Моравия, под владов Третього райху. Наперек своим гаранциям подля Мюнхенской догварькы, Велика Британия и Франция не выправили свои армады на оборону Чехословакии.[2][3]
Анулованя
[едітовати | едітовати жрідло]Велика Британия одволала свой подпис под Мюнхенсков догварьков 5. августа 1942, Франция — 29. септембра 1942, Италия — в року 1944. Дефинитивно Мюнхенска догварька одволана в договорѣ 11. децембра 1973, котрый подписали Чехословакия и ФРГ.[2]
Жерела и одказы
[едітовати | едітовати жрідло]- Munich Agreement. Encyclopedia Britannica. 22 Feb. 2021. https://www.britannica.com/event/Munich-Agreement. [перевірено 2021-07-26].англ.
- Мапа роздѣлу Чехословакии Германиев, Мадярщинов и Польщов концьом 1930-х мад.
- Трухачев В. В.. Мюнхенский сговор. Энциклопедия Всемирная история. https://w.histrf.ru/articles/article/show/miunkhienskii_sgovor. [перевірено 2021-07-26].русс.