Никифор Дровняк
Никифор Крыницкый | |
---|---|
Епифаний Дровняк | |
Фото од Тадеуша Ролке, 1963 | |
Чинность | наивный малярь |
Жанр | наївне мистецтво |
Горожанство | Австро-Угорьско, Рѣчь Посполита II., Польска Людова Република |
Уроджѣня | мая 21., 1895 |
Крыниця-Здруй, Австро-Мадярщина | |
Упокоеня | октобра 10., 1968 (73 р.) |
Фолюш, Польща погреб: Крыниця-Здруй | |
Причина смерти | сухоты |
Похованя: Крениця
| |
VIAF:26021563; GND:118587994; LCCN:n84236828; FAST:1838112; BNF:146169315; NLKR/NLC:jx20060920003; OL:OL5278149A;
Ту можуть быти податкы з Wikidata, не контролованы авторами статѣ |
Епифан Дровняк: фотогалерия з живота | |
Никифор або Никифор Крыницькый, пол. Nikifor Krynicki, властным меном Епифаний Дровняк, * 21. май 1895, Крыниця-Здруй – † 10. октобер 1968, Фолюш) — вызнамный русинскый (лемковскый) наивный малярь, котрый жив и творив переважно в польскых купелях Крыниця-Здруй (в його часѣ званых Крыниця).[1]
Скоро цѣлый живот быв недоцѣненый, самотный и худобный, увязненый в психичной хворотѣ. Його дѣла были оцѣнены аж на концю жывота, а днесь Никифор признаный за едного з найвызнамнѣшых наивных малярьох. В центрѣ мѣста Крыниця-Здруй чинный музей Никифора.
Биография
[едітовати | едітовати жрідло]21. мая 1895 глухонѣма жебрачка з Крыницѣ Лемкыня Евдокия Дровняк уродила дѣтвака од отця, зоставшого непознаным. Як в такых припадах кажуть церковны правила, в мѣстной грекокатолицкой церкви хлопець зостав окрещеный на имя святого Епифания (чий день 25. май), и записаный до матрикы як Епифан Дровняк. Але мати го называла Никифором. Мати умерла, коли еще быв малый хлопець, а вырос майже глухонѣмым, не так з физичных, як з психологичных причин.[2]
Нигда не ходив до школы, не научив ся читати и писати, лем мальовати. Жив з алмужны, за котру ся оддячовав своима малюнками, але тоты малюнкы люде поважовали за нич не варты. Зачатком 1930-х Никифора объявив львовскый малярь Роман Турин, котрый представив образы Никифора на выставцѣ в Парижу (1932), де мали великый успѣх. О Никифорови зачали писати.[3]
В року 1947 як Лемко быв выселеный на западны землѣ, але трираз пѣшо вертав ся назад. В року 1949 быв «еще раз объявеный», коли його роботы были выставлены во Варшавѣ, а в 1950-х уже пошли широко по свѣтѣ.[1] Никифор быв принятый до Сполку польскых вытварных умѣлцьох (Związek Polskich Artystów Plastyków) за честного члена.[4] В зачатку 1960-х польска влада, зваживши на добыту Никифором велику славу в заграничу, дала бездомному малярьови добре убытованя и опѣкуна и двараз рочно подлѣчовала го в санаториях, бо быв невылѣчимо хворый на туберкулозу и дыхавицю.[5] В часѣ едного такого побываня в санаторию в Фолюшу, 10. октобра 1968 и закончив ся живот Никифора.
Творба
[едітовати | едітовати жрідло]- Техника
- Малюнкы Никифора суть переважно в техницѣ акварел и гваш. Мальовав и олайовыма фарбами, але ани една така мальба ся не захранила. Мальовав ай колоровыма церузами, переважно в остатных роках.[6]
- Тематика
- Мальовав вшитко: интерьеры церков, хыж, бовтох, кухонь, з людми и без них; портреты и автопортреты, пейзажы и жанровы сцены, будовы и улицѣ фантастичной архитектуры великых форматох, але и миниатурны иконы. Любив там зобразити и себе самого в подобѣ епископа, урядника, учителя, або и святого. Ачей, мав то за свого рода компензацию за то, же зостав неученый.[6]
- Надписы
- Характерныма про Никифора суть надписы, найчастѣйше на сподѣ образа. Суть безо всякого смысла, бо быв он аналфабет, але суть композичным елементом образа. Часто меджи тыма буквами суть осмыслены слова, напримѣр «село», а тыж звыкла быти написана цѣна образа.[6]
- Колоры
- Найсилнѣйшым елементом в образах Никифора суть колоры: в них проявлять ся фантастичный малярскый дар. Игра и взаимодѣя колорох, привельо смѣлых в комбинациях, але все гармонийных, створюе настройову драматичну експресию и е неповторным Никифоровым штилом.[6]
- Печаткы
- Никифор давав собѣ справити печаткы и позначовав свои мальбы на реверсѣ листа печатков. На тых печатках, котрых мав дас десяток, быв часто його автопортрет. То быв еще еден способ подкреслити важность свою и свойой роботы.[7]
Бой за честь имени
[едітовати | едітовати жрідло]Комунистична влада Польщи по тому, як взяла на себе опѣку над бездомным малярьом, в року 1962 выдала му фалшиву матрику и документы на имя Nikifor Krynicki.[1] Было то зроблене на основѣ рѣшѣня суда в Новом Сончу з мотивациов, же «славный малярь Nikifor з Крыницѣ не мать призвиска, а понеже настало бывать и творить в Крыници, постанавлять ся дати му призвиско Krynicki».[8] Коли отворили музей Никифора не было дозволене там подати правдиве имя маляря, ани написати го на гробѣ. Стоваришѣня Лемкох Польщѣ зачало через суд добивати ся скасованя фалшивых документох з добы комунистичной влады.[1] Процес тяг ся 6 рокы, суд в Мушинѣ сягнув до архивох грекокатолицкого епископства в Перемышлю и найшов матрикалны книгы зоз записом: «Epifaniusz Drowniak, ur. 21 maja 1895 r. w Krynicy, syn Eudokii Drowniak – córki Grzegorza i Tatiany» и выяснив од свѣдкох, же имя Никифор походило лем з каждоденного живота: так го называли знакомы и критикы малярства. Наконець 26. марца 2003 Районовый суд в Мушинѣ скасовав рѣшѣня и фалшивы документы з року 1962 и вернув Епифанию Дровняку його правдиве имя.[8] Одтогды Никифор и Никифор Крыницкый зостають лем малярскыма псевдонимами умѣлця.
Жерела и одказы
[едітовати | едітовати жрідло]- Jerzy Leśniak (2003). Odzyskana tożsamość. Bezprecedensowa decyzja sądu w Muszynie. lemko.org. http://www.lemko.org/gazeta/lesniak/nikifor.html. [перевірено 2020-05-26]. пол.
- Богдан Горбаль: Никифор Криницький //Енциклопедія історії та культури карпатських русинів. Укладачі Маґочій П. Р., Поп І. — Ужгород: Вид-во В. Падяка, 2010. — 856 c.+ХХХІІ с. ISBN 978-966-387-044-1 укр. Сс. 538–539.
- Вадим Лесич: Никифор з Криниці. — Сучасність, 1971 укр. Илустрована монография (PDF) Одчитане 2020-05-26
- Zbigniew Wolanin. NIKIFOR MALARZ – NIKIFOR ARTYSTA. Музей Никифора. http://muzeum.sacz.pl/nikifor/. [перевірено 2020-05-27].
- Юрій Шипович (20. мая 2020). 125 рōкӯв Нікіфōру Дрōвняку (Крыницькōму) – живот лемковського маляря-наівіста. rueportal.eu. https://www.rueportal.eu/gazeta/may20/125-rokuv-nikiforu-drovniaku.html. [перевірено 2020-05-24].