客家
客家(粵拼:haak3 gaa1;客家白話字:Hak-kâ;可以喺後面加「人」、「族群」、「民系」來組詞)係漢民族底下嘅民系[7][8],大多生活響華南,比如福建、廣東、江西、香港、台灣,其中主要聚居喺粵贛閩交界嘅地方[註 2]。佢哋響東南亞乃至世界各地亦好多,響全世界大約4500萬到8000萬以上[2][4][9][10][註 1]。四川亦有客家,不過稱之爲(土)廣東人(tou2 gwong2 dung1 jan4)。而桂南粵西嘅粤客雜居區,本地粵人自稱地佬,而客家人叫新民(san1 man4)。客家人嘅首要語言係客家話,間中有兼識講各地嘅本地話。
客家 Hak-kâ | ||||||||||||||||||||||||||
---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
總人口 | ||||||||||||||||||||||||||
4500萬[1][2][3][4]~1億2000萬[5][6][註 1] | ||||||||||||||||||||||||||
分佈地區 | ||||||||||||||||||||||||||
大中華區(廣東、福建、江西、廣西、香港、臺灣等等)、南洋(泰國、大馬、星架坡、菲律賓、印尼、柬埔寨等等)以及世界各地嘅唐人街 | ||||||||||||||||||||||||||
廣東 | 1550萬~2100萬[2] | |||||||||||||||||||||||||
江西 | 500萬~1250萬[2] | |||||||||||||||||||||||||
廣西 | 460萬~500萬[2] | |||||||||||||||||||||||||
福建 | 400萬~500萬[2] | |||||||||||||||||||||||||
四川 | 250萬~380萬[2] | |||||||||||||||||||||||||
湖南 | 50萬~200萬[2] | |||||||||||||||||||||||||
臺灣 | 170萬~460萬[2] | |||||||||||||||||||||||||
香港 | 125萬[2] | |||||||||||||||||||||||||
澳門 | 10萬[2] | |||||||||||||||||||||||||
150萬[2] | ||||||||||||||||||||||||||
125萬[2] | ||||||||||||||||||||||||||
55萬[2] | ||||||||||||||||||||||||||
28.4萬[2] | ||||||||||||||||||||||||||
15萬[2] | ||||||||||||||||||||||||||
15萬[2] | ||||||||||||||||||||||||||
15萬[2] | ||||||||||||||||||||||||||
10萬[2] | ||||||||||||||||||||||||||
10萬[2] | ||||||||||||||||||||||||||
8.1萬[2] | ||||||||||||||||||||||||||
4.3萬[2] | ||||||||||||||||||||||||||
3.5萬[2] | ||||||||||||||||||||||||||
3萬[2] | ||||||||||||||||||||||||||
2.5萬[2] | ||||||||||||||||||||||||||
2.5萬[2] | ||||||||||||||||||||||||||
1.8萬[2] | ||||||||||||||||||||||||||
1.2萬[2] | ||||||||||||||||||||||||||
6800[2] | ||||||||||||||||||||||||||
語言 | ||||||||||||||||||||||||||
客家話 | ||||||||||||||||||||||||||
宗教信仰 | ||||||||||||||||||||||||||
大乘佛敎、道敎爲主。有儒敎、中國民間信仰背景。少數信基督敎或者其他敎。亦有唔信敎或者無神論。 | ||||||||||||||||||||||||||
相關種族 | ||||||||||||||||||||||||||
漢族 |
而家一般認爲客家人嘅祖先原先住喺華北嘅黃河流域,亦即稱之爲中原嘅地方,比如家下河南、山西等地,呢個族群嘅形成同從東漢之後開始嘅唐人南渡有好大關係[註 3]。佢哋所講嘅客家話,亦認爲同古代嘅中原唐話好接近,一啲字音同其他保存古音特色嘅話好接近,包括日文呢啲引入咗古中國文化嘅外文[11]。不過雖然係移民,佢哋都歸化做當地人,同啲土著衝突、融合,經過一千年時間成爲一個獨特嘅族群──「客家」呢個名其實係原住民對佢哋嘅稱呼,話佢哋係外地人,雙方有衝突,甚至有土客械鬥;不過客家文化亦有融合到週邊族群文化[12][13]。
雖然好似語言等方面客家好唔同於週邊嘅族群,但都無話佢哋係異族而睇做漢族一支,不過喺越南,客家係官方認定嘅少數民族之一,嗌做𠊎族(ngaai5 zuk6;越南文:người Ngái/𠊛𣈜;隻字係「亻厓」),係指比較早落籍越南嘅客家人,近代移民越南嘅都劃去華族。而佢哋得噉嘅名,係因爲啲越南人聽到佢哋講嘢厓前厓後(客家白話字:ngài),就攞呢個音來安名,查實呢個字係「我」噉解,有客家字寫做「𠊎」。另外喺越南佢哋又有遞個名做係族(hai6 zuk6;越南文:người Hẹ/𠊛𦵠),同樣係因爲聽佢哋講嘢𠺪𠺪聲(客家白話字:he)亦都起個噉嘅名,其實呢個字同粵語嘅「係」同一隻,係同源詞。
名
編輯客家之名,係相對於「主人」嘅稱呼,亦即外江人。客家呢個名最初出自本地人對佢哋嘅稱呼,後來客家民系、族群認同形成,呢個他稱就轉爲自稱,保留至今。得到噉嘅名,表明相對周邊嘅原住民、先居漢人嚟講,客家人係比較遲進入當地嘅移民。
顯然,客家個名亦就近百年先出現、傳播、固化[14]。但都唔似客家噉強調自身嘅移民背景,好似廣府人噉,都認爲自己係土生土長嘅本地人,係當地主人。而曾幾何時,廣府人嘅歷代先祖來到廣東,都試過同百越土著、住落在先嘅漢人摩擦,但經過千年融合,都你我交融,唔分邊個住落先。而客家地區嘅客家人,佢哋本身就係本地人,同廣府人一樣,自移居當地後,世代住落,但佢哋自稱客家。所以,原先嘅主客之分實質係籍貫之分,但現時嘅客家稱謂並唔指向籍貫(本貫主義),而係指向族群(方言主義)[14]。換言之,話呢個人係客家,唔係睇佢鄉下,而係睇佢講咩話、咩血統、邊群人。
客家原本係戶籍概念。從明朝中葉開始到淸雍正期間,粵東喺呢兩百年由於動亂,令居民流散,田地荒棄,之後軍屯瓦解,屯田荒蕪;清朝之後因爲民間反清復明,淸廷實行遷界禁海,損耗本地人口,展界後復墾艱難,於是政府招墾移民[14]。由於造冊定籍,呢啲移民嗌做寄民、流寓、客戶、客民、客人,都係戶籍制度下嘅中性稱呼[14]。呢時只係「舊人─新人」、「主─客」之分,並無牽涉到特定嘅語言群體。
不過入清以後,一波又一波嘅移民抵達屯田最多嘅廣州府、肇慶府,而呢啲移民絕大多來自潮州府、惠州府、嘉應州嘅客家話地區[14]。同廣府人接觸後,由於租佃關係、土地爭端,土客爭鬥激烈[註 4],客家呢個名變成貶稱。由於呢啲移民鄉音接近,令客家呢個詞有咗籍貫同語言族群嘅雙重含義[14]。「本地籍─外地籍」嘅籍貫之分轉變爲「本地話─客家話」嘅語言之分,個過渡就喺呢度。
而將「客家」定義爲一個語言族群,直接源於19世紀中葉後嘅傳教士。傳教士從語言角度去認識、理解廣東人,進而根據語言劃分廣東三大族群:本地(Punti)、鶴佬(Hoklo)、客家(Hakka)[註 5]。「客家」個名原先係廣肇二府人對異籍、異邑人嘅貶稱,經傳教士嘅學術研究,轉變爲中性詞,再透過傳教機構傳播、影響返客家地區,畀客家人接受,成爲族群自稱[14]。[15]。
聚居地
編輯客家人主要住喺華南,比如廣東東部同北部(此外廣東各地有散佈)、福建西部、廣西東南部、海南同臺灣,華南之外亦有聚居區,比如四川東南部、貴州南部、江西南部、湖南南部[註 2]。同時喺海外嘅客家僑裔亦好多,主要喺東南亞,比如馬來西亞、星架坡、泰國等。其中,廣東係中國第一大客家分佈省,佔全球客家人口近三分一[16],亦佔廣東本地人口近三分一[17];而喺香港,亦係有三分一嘅唐人係客家,而喺臺灣則係佔到四分一到五分一[18];而喺海外唐人當中則佔到六分一[2]。客家喺世界上係好大嘅移民族群,包含客家在內嘅華僑同猶太人、亞美尼亞人、印僑合稱爲「四大移民群體」。
而家梅州係客家最主要嘅住地、集散中心,稱做「世界客都」,此外梅州、贛州、汀州、惠州夾埋做「客家四州」,係客家嘅大本營,除咗梅州,贛州嗌「客家搖籃」,汀州嗌「客家首府」,惠州嗌「客家僑都」[19][20][21]。此外,寧化石壁嗌做「客家祖地」,河源嗌做「客家古邑」。
喺臺灣,客家聚居喺中北部,桃園、新竹、苗栗呢三縣係中心,佢哋喺福佬人(所謂福佬係指祖籍閩南嘅人,同樣係福建族群嘅閩東人唔算做福佬)之後去到臺灣,係繼福佬之後臺灣第二大族群。而家臺灣一般啲公眾播報有客家話嘅,比如交通報站就喺放完國語、福佬話之後放客家話。臺灣有世界唯一專門做客家話廣播嘅電視臺客家電視臺,呢個有綫電臺做新聞、文化節目,比如話放劇集、做啲娛樂節目噉。
史
編輯漢人南渡同民系形成
編輯就其移民史睇,主要係三次嘅南遷逐漸從中原來到東南(呢三場移民潮亦都影響到南中國其他唐人分支嘅形成)。
- 第一次喺晉朝。公元291年,西晉八位諸侯王爲咗爭皇位,內戰十六年,亦即八王之亂,北方遊牧民族乘機挺進中原農耕區,建政立國,史稱五胡亂華、永嘉之亂。黃河流域嘅中原、華北民不聊生,啲人就陸續南遷到長江以南避難。西晉滅亡之後,司馬睿立東晉並遷都建康(今日南京),更加之帶動一大批遺民隨晉室南渡。呢啲遺民大多官仕僚紳、世家大族,所以叫做衣冠南渡。大部分人搬到江淮,最遠到江西。
- 第二次喺唐末。公元875年,黃巢之亂,勢力好快捲到中原。傳聞黃巢軍四圍濫殺無辜,喺圍攻陳州(今河南淮陽)時,由於食晒軍糧,士兵就捉人來食,將俘虜掟入幾百個大坑內,直接用大石碓搗碎,和骨而食,號稱「啖食數十萬人」,啲人緊係聞風而逃啦。後尾仗打到南來,晉時避難江淮嘅人被迫繼續南遷到更南嘅福建、江西。
- 第三次喺兩宋之交。1127年,女真人佔咗北宋京城開封,北宋淪亡,同年趙構立南宋並遷都臨安(今杭州),呢次南渡亦帶動大批宋代顯赫家族南渡,亦有好多中原百姓唔願畀女真人統治,亦都跟住南遷。呢次南遷係史上最大嘅漢人南渡,之後,客家人入粵,主要住喺閩粵贛交界,而客家嘅概念基本成型,出現呢支民系。
而客家學者羅香林提出「客家五次遷徙說」,話客家人嘅南遷同形成分五次。第一次係晉朝五胡亂華時,由中原搬到長江中下游[22],而支前鋒順贛江入贛南,抵達家下梅州大埔[23];第二次係唐末黃巢兵亂,原先搬到長江中下游嘅人再搬去贛閩粵交界[22],亦遞個版本話係安史之亂時由各省嘅客家先民沿贛江滙聚喺贛閩粵交界區[23];第三次係宋代靖康之變時,客家擴散到廣東嘅東、北部[22],佔據梅州、惠州[23],亦有話喺南宋滅亡時朝廷走難廣東,畀元軍追住打,隨行嘅北方臣民留咗喺廣東;第四次係明末清初,因爲清軍南下,客家繼續擴散到廣東中部、西部、濱海,兼且有部分搬到廣西、湖南、臺灣(跟住鄭成功去嘅)[22],而後來因爲客家區人口膨脹,咁啱政府發起湖廣填四川,有客家搬到四川、貴州[23];第五次,因爲太平天國[註 6]、土客械鬥都涉及到客家,有啲客家搬去海南島,乃至海外[23][22]。不過對羅香林嘅五次遷徙說,有批評認爲佢講到客家形成完全就係唐人南渡,而忽略其他南方唐人亦都同南渡有關[註 3],過份強調客家嘅唐人族源,而忽略咗佢哋來到南方後同當地文化嘅融合[22]。
亦有人將客家嘅五次遷徙總結爲四個階段:第一個係起源階段,從秦代兼併嶺南入中國到衣冠南渡;第二個係異變階段,係秦、漢、唐,同前後兩個階段有重合,就係由移民歸化爲本地;第三個係形成階段,從晉朝到清代;第四個係外遷階段,主要係明清時由嶺南遷去外省乃至外國[24]。
北來嘅客家人唔多受當地人嘅歡迎,因為閩粵贛交界嘅資源本來唔多,叫做「八分山,一分田一分水」,剎時間咁大棚人殺來,勢必同當地人爭田爭水啦,喺爭奪生存空間資源之餘,再加上語言、風俗差異,土客爭端激烈。明清時,人口增多,資源更加唔夠分,「客家佔地主」,就有大小武裝衝突──土客械鬥。1854年,鶴山嘅當地人同客家人各抄家生來大戰,呢場械鬥幾萬人參與、歷時14年,直到政府出面干涉先停低。
文化
編輯客家文化有佢獨特嘅地方,對男人嘅要求就係讀書出仕[25]。身爲移民,一般來講難啲得到大笪靚地,所以多啲人做生意、賣嘢,要闖出去,就要好重視敎育仔女,所以客家人崇文重敎,敎育發達之下亦有唔少客家人做敎職。呢啲特點令客家有名做「中國嘅猶太人」[26][註 7]。
客家嘅族群意識強,由於佢哋嘅遷徙經歷,好關注自己家族嘅來頭,所以份族譜保存得好好,亦好崇拜祖先。佢哋堅守自己族群嘅文化,保留咗啲古老風俗習慣,時時意識到保存母語,有講話「寧賣祖宗田,不賣祖宗言」,客家話本身保存咗啲古語嘅發音、語法、辭彙,譽為古漢語活化石。誕生於河南一帶嘅古漢語之所以喺東南一帶保存最好,就同包括客家南遷在內嘅漢人南渡相關,亦都因爲東南地理環境有利保存舊時文化[12]。
語言
編輯客家人嘅母語主要係客家話,但喺廣東,由於白話嘅影響力同推普,所以唔少客家人識講白話同普通話,但對內係講客家話。
客家話同江西話嘅聯繫比較密切,甚至畀一啲學者睇成係同一語言嘅兩個分支,不過客家話始終唔同過江西話,因爲客家地區同鄱陽湖地區嘅環境唔同,鄱陽湖一帶同江北嘅交往密切啲,同官話嘅交集比較多,而客家因爲喺山區,保留得比較多舊時話嘅特點[12]。
客家話分南北兩大片,北片係閩西、贛南、粵北,南片係粵東、港臺、粵西、湘貴川。北片嘅客家人其實係新舊唐人移民融合而成,客家意識亦無噉強;而南片係宋元後先大量移民嘅,因爲同南邊粵語區、東邊閩語區爭奪過生存空間,所以激發出比較強嘅族群意識[12]。
政治
編輯由於舊時客家同週邊族群嘅衝突嚴重,作爲外來客本身比較劣勢,所以客家傾向於同當地政府、乃至中央政權維持良好關係,同時由於崇文重敎、讀書出仕嘅風氣,好多客家人做官,乃至喺中國政壇上形成客家幫。比如現時廣東政壇上,有客家、潮汕、廣府三大勢力,而客家幫嘅勢最大,呢個政治勢力源自舊時中共元老葉劍英,又稱做梅州幫、葉派[27]。唔單止廣東地頭,華人政界度都有好多客家人,比如中共領導人鄧小平(四川客家)、中華民國總統李登輝(臺灣客家[註 8])、星架坡總理李光耀、泰國總理丘達新同丘英樂兩兄妹(海外客家)。
崇文之餘,客家亦尚武。喺舊時中國,由於階級意識,傳統上軍人好受社會輕視,難聽叫「兵痞」,認爲得啲爛仔流氓先會入伍。不過客家地區有尚武之風,亦熱衷從軍,噉係因爲客家作爲移民群體,去到陌生地方,除咗要防備盜賊土匪,亦要小心同本地人嘅種種衝突,所以人人講武,要打得踢得,先保得住身家性命、鄉親父老[28],舊時甚至條條客家村都有拳館[29]。呢種習武從軍風氣令客家人多參與叛亂、革命。比如話太平天國首領洪秀全及主要將領都係客家人,兵卒亦客家多;發起辛亥革命嘅孫文及其主要革命軍部屬亦係客家嘅[29]。
而到近代,客家地區係支援中國共產黨嘅主力之一,南昌暴動之後,中共正式建軍,之後紅軍嘅勢力盤踞喺粵閩贛山區,亦即客家地區嘅主體部分,中共曾經一度喺贛南瑞金建立中華蘇維埃共和國政府,之後因爲國民政府嘅圍剿而放棄當地。呢啲由中共控制盤踞嘅地域稱爲「蘇區」,喺中共土地革命期間(1927年到1934年),九個蘇區有七個位於客家地域(包括海陸豐在內),有好多客家人加入共產黨,中共有好多領導人係客家籍嘅[30]。
建築
編輯爲咗保護自己嘅生存空間,客家人就發明咗獨特建築──客家圍屋,呢種屋喺廣東嗌做圍龍屋,喺福建嗌做土樓,喺江西嗌做圍樓、半圍樓[31]。由於舊時住喺中原,客家人受儒家影響好深,注重家族觀念,多數南遷時係大家族一齊行,再加上同當地人夾唔埋,爲咗抵擋當地人同兵災匪患,就造出成頭家族圍樓而居嘅城堡[31]。其中圓形嘅嗌做圓樓,因爲防衞能力高,又嗌做圓寨;正方形之類嘅四角形嘅嗌做方樓;重有種嗌做五鳳樓,即係宮殿式或者府邸式嘅圍屋;另外重有其他形狀嘅圍屋,如凹字形、半圓形、八卦形[32]。唔係所有客家人都住圍龍屋,但一啲客家亦整出咗其他嘅防禦建築,比如廣東同香港嘅客家村有好多嗌做「圍」,即係圍村,條村出邊有埲好似城牆噉嘅圍牆,呢埲牆就係用來防範強盜土匪[33]。不過唔係所有圍村都係住客家嘅,有分本地圍同客家圍[33]。
而家圍屋當中,福建嘅最出名,2008年7月福建土樓畀聯合國教科文組織入選爲世界文化遺產。關於圍龍屋,一直有噉嘅傳聞:由於啲圍龍屋個樣似導彈發射井,1980年代時美國影到中國大陸客家山區嘅衛星相,好似有好多大規模嘅核基地,搞到美國以爲北京當局大規模發展核武器,派間諜去當地刺探先知其實係圍龍屋。但而家證實呢個傳聞其實係流料,係個作家虛構嘅情節,因爲古仔神奇,情節又虛構得好似真噉,成個中文界傳到墟墟冚,結果炒起福建土樓嘅名聲。一啲文史專家認爲,作爲旅遊推廣係好掂,但而家出咗名,就唔應該繼續炒呢條流料,係時候正視聽[34]。
睇埋
編輯註
編輯- ↑ 1.0 1.1 客家究竟有幾多人,無精準數字,因爲無專門統計。1970年香港崇正總會頒佈嘅數據係4500萬人左右,4000萬喺中國,500萬喺海外;1994年梅州舉辦世界客屬第十二次懇親大會,滙總統計全球客家人6562.429萬,其中中國6107.8萬,海外454.629萬。所以而家個數字應該係8000萬左右,亦有啲媒體話係過億人。
- ↑ 2.0 2.1 羅香林分別喺1933年、1950年做過統計。1933年統計:純客縣廣東17、江西10、福建5、合計32;非純客縣廣東44、江西17、福建4、廣西13、四川10、湖南4、臺灣3,合計95。共有127縣。1950年統計:純客縣廣東15、江西10、福建8、合計33;非純客縣廣東50、江西17、福建7、廣西45、四川13、西康1、湖南5、貴州1、臺灣5,合計144.共有177縣。按照佢嘅統計,客家分佈區好似海南崖縣、四川廣漢、臺灣彰化之間嘅大三角區,當中除咗湖北外所有省都有客家分佈,其中客家大本營喺粵贛閩交界[2]。
- ↑ 3.0 3.1 比如話衣冠南渡,係西晉時啲中原唐人爲咗避開永嘉之亂而南下,其中富家世族好多。而之所以大規模嘅唐人南渡係從東漢之後開始,係因爲中央集權帝國係從秦漢時建立嘅,而之前,中原都亂過,比如春秋戰國,但因爲國家多,一國亂唔等於各國亂,未形成大規模、有總體方向(向南)嘅移民潮。而中央集權化後,中央一轉移,都會帶起大班臣民跟住中央走難。歷代規模大嘅唐人南渡除咗衣冠南渡外,重有唐代安史之亂、宋代時女真人攻陷北宋京城後嘅南渡。此外蒙古滅宋、滿清滅明,都係由北打到落南。
- ↑ 造成土客爭端嘅經濟原因背後,有地理及歷史因素:地理上,成個廣東就得珠三角係富庶繁榮嘅大片平地,始終唔抵得似湖廣呢啲地方噉有極其廣闊嘅良田靚地,於是所有移民集中喺珠三角(廣肇二府);歷史方面,康熙時攤丁入畝,取消人頭稅,放鬆人口控制,結果中國人口暴增,廣東亦唔例外,呢個人口爆炸成爲社會唔安定嘅因素。康乾盛世一過,人多地少嘅經濟矛盾逐步顯現。亦因爲爭端,激發出客家嘅族群意識,而無同本地融合,所以珠三角各地有星羅棋佈嘅客家語言島。
- ↑ 論文原文中Hoklo寫成「福老」,呢度用Hoklo一詞對應嘅粵文寫法。舊時廣東流通嘅係省城白話,係廣東各族群之間嘅溝通用語,傳教士爲咗方便廣東傳教,習得嘅都係呢隻話。「佬」係廣話對其他人群嘅中性乃至偏貶義嘅稱呼後綴,而前面嘅「鶴」乃係用廣音轉嘅潮音,hok係「福」嘅潮州話文讀。Punti、Hoklo、Hakka三詞都係傳教士從白話度譯出。
- ↑ 太平天國嘅發起人洪秀全就係客家人,當其時有好多嘅客家人跟住洪秀全打仗,所以當時對客家有族群敵視。
- ↑ 唔好同中國猶太人撈亂。猶太人其實亦係中國嘅少數民族,除咗本土嘅猶太人,喺20世紀上半葉亦有外來嘅猶太移民、難民來中國,甚至日本喺侵華期間搞河豚計劃想安置西方猶太人喺中國定居。
- ↑ 臺灣客家分本省同外省,李登輝係本省客家,先世好早就移咗去臺灣。而所謂外省客家,係指中華民國渡臺後跟住中央政府過去嘅大陸客家人,比如臺灣導演侯孝賢。
參考
編輯- ↑ 〈客家淵源〉. 客家風情. 原著喺2016年3月5號歸檔. 喺2014年11月3號搵到.
- ↑ 2.00 2.01 2.02 2.03 2.04 2.05 2.06 2.07 2.08 2.09 2.10 2.11 2.12 2.13 2.14 2.15 2.16 2.17 2.18 2.19 2.20 2.21 2.22 2.23 2.24 2.25 2.26 2.27 2.28 2.29 2.30 吳福文 (2013年8月16號). 〈客家人在世界各地的分佈〉. 《新華網》. 華夏經緯網. 原著喺2014年7月24號歸檔. 喺2014年11月3號搵到.
- ↑ 〈客家簡介〉. 原著喺2008年3月26號歸檔. 喺2014年11月3號搵到.
- ↑ 4.0 4.1 鍾肇政. 〈台灣客家人的分佈〉. 《《客家風雲雜誌》第23期》. 客家世界網. 原著喺2016年3月5號歸檔. 喺2014年11月3號搵到.
- ↑ 李國參. 〈《回聲》方言被造反的聯想〉. 世界新聞網. 喺2014年11月3號搵到.
{{cite web}}
: CS1 maint: url-status (link) - ↑ 〈吳伯雄回鄉祭祖 兩岸客家文化交流再次升溫〉. 國家新聞出版廣電總局、中國廣播電視協會對臺港澳節目委員會. 2009年6月11號. 原著喺2020年3月16號歸檔. 喺2014年11月3號搵到.
- ↑ Rubinstein, Murray A. (2004), "Rethinking Taiwanese and Chinese Identity: Melissa J. Brown's Is Taiwan Chinese?" (PDF), iir.nccu.edu.tw, 國立政治大學,第40卷, pp. 454頁─458頁, ISSN 1013-2511, 原著 (PDF)喺2011年7月27號歸檔
- ↑ "Hakka culture" (英文). Newsgd.com. 2009年8月24號. 原著喺2015年1月21號歸檔. 喺2014年11月26號搵到.
- ↑ "Hakka (people)". 大英百科全書. 2013年2月26號. 原著喺2020年3月28號歸檔. 喺2014年11月3號搵到.
- ↑ 喬還田. 〈天下客家一家親——客家人與客家文化漫談〉. 《《人民論壇》2005年第一期》. 人民網. 原著喺2010年3月23號歸檔. 喺2014年11月6號搵到.
- ↑ 〈為什麼客家話、粵語中的一些詞語發音和日語很像?〉. 知乎. 喺2014年11月6號搵到.
- ↑ 12.0 12.1 12.2 12.3 〈客家方言與客家文化〉. 中國客家博物館. 2014年8月5號. 原著喺2015年8月8號歸檔. 喺2014年11月27號搵到.
- ↑ 〈畲族和客家關係討論〉. 客家網. 喺2014年11月26號搵到.
- ↑ 14.0 14.1 14.2 14.3 14.4 14.5 14.6 施添福 (2014年5月). 〈從「客家」到客家(二):粵東「Hakka·客家」稱謂的出現、蛻變與傳播〉 (PDF). 全球客家研究. 原著 (PDF)喺2020年10月22號歸檔. 喺2015年1月4號搵到.
- ↑ 蔡驎 (2007年2月7號). 〈HAK-KA與SAN-HAK——客家稱謂的由來及本義考〉. 《《贛州與客家世界》國際學術研討會論文集》. 福客. 原著喺2012年5月25號歸檔. 喺2015年1月4號搵到.
- ↑ 譚元亨 (2009年3月19號). 〈貫徹十七屆三中全會《決定》 進一步做好廣東農民工的各項工作〉. 中國評論學術出版社. 喺2014年11月17號搵到.
- ↑ 〈廣東省客家商會簡介〉. 廣東省客家商會. 原著喺2015年4月24號歸檔. 喺2014年11月17號搵到.
- ↑ 〈客家的起源與分佈〉. 《中國臺灣網》. 華語廣播網. 2011年4月7號. 原著喺2020年3月16號歸檔. 喺2014年11月17號搵到.
- ↑ 〈【客家大百科】客家四州〉. 天下客家. 2012年2月17號. 喺2014年11月6號搵到.
{{cite web}}
: CS1 maint: url-status (link) - ↑ 岳蔚敏 (2014年5月7號). 〈「客家四州」指的是哪裡〉. 2014年中國開封世界客屬第27屆懇親大會. 原著喺2020年3月16號歸檔. 喺2014年11月6號搵到.
- ↑ 〈客家大本營「客家四州」〉. 江門市河源龍川商會. 原著喺2020年3月16號歸檔. 喺2014年11月6號搵到.
- ↑ 22.0 22.1 22.2 22.3 22.4 22.5 〈客家源流與發展〉. 客家委員會. 原著喺2015年1月28號歸檔. 喺2014年11月10號搵到.
- ↑ 23.0 23.1 23.2 23.3 23.4 〈廣東客家博物館 再現客家人五次大遷徙〉. 《廣州日報》. 中國評論新聞網. 2007年10月23號. 喺2014年11月10號搵到.
- ↑ 〈解密客家人的真實起源,客家文化形成經歷了四個階段〉. BuzzHand. 2014年10月30號. 喺2014年11月10號搵到.
- ↑ 〈客家農村「女勞男逸」的歷史淵源〉. 《走進客家網》. 中國評論新聞網. 2006年9月23號. 喺2014年11月26號搵到.
- ↑ 黃燦波. 〈教育譜出了流亡者的神話——猶太人和客家人比較研究〉. 中央美術學院藝術資訊網. 喺2014年12月14號搵到.
{{cite web}}
: CS1 maint: url-status (link) - ↑ 〈廣東「客家幫」政治明星殞落 地方勢力再受壓〉. 《明報》. 倍可親. 2014年6月28號. 原著喺2020年3月16號歸檔. 喺2014年11月27號搵到.
- ↑ 〈走進廣西賀州客家(二)——崇文尚武的客家人〉. 中廣網. 喺2014年12月26號搵到.
- ↑ 29.0 29.1 李苑. 〈談客家人的尚武精神〉. 客家文化研究暨推廣中心. 原著喺2016年3月5號歸檔. 喺2014年12月26號搵到.
- ↑ 趙樹岡. 〈第二章 汀巖山坳小鎮、二 蘇區與客家意象〉. 《星火與香火:大眾文化與地方歷史視野下的中共國家形構》. 聯經出版. p. 65頁─74頁. ISBN 978-957-08-4348-4.
1927年8月1日的南昌暴動,被中共標誌為建軍之嚆矢,具備以武力對抗國民黨政權的關鍵。南昌暴動後,中共主力大致在閩西與贛南之間流竄,1931年在贛南瑞金成立「中華蘇維埃共和國」政府,1934年因國軍圍剿,共軍又由閩贛流竄至陝甘寧,展開黨史所謂的「長征」之路,此後閩西、贛南除了零散的遊擊隊、赤衛隊以及地下組織,全區大體上還是由國民黨掌握。中共主力盤據贛南、閩西交界時間雖然不長,但在中共革命史卻具有武裝部隊初步形成,最早建立農村割據政權、進行土地革命等關鍵意義,這些根據地即所謂的「蘇區」,或是相對國民黨統治「白區」意外的「紅區」。……在探討客家社會文化特質,以及客家人「傳統」性格的過程中,革命傳統與客家傳統的關係也成為重點。蘇維埃地區集中在客家聚落,革命時期的中共重要領導人及軍事將領的客家身分被刻意凸顯……Mary Erbaugh 強調中共「土地革命」(1927─1934)期間,包括廣東海陸豐在內,9個「蘇區」有7個位於客家地區,並指出當代學術界忽略中共許多領導人的客家背景……
- ↑ 31.0 31.1 〈客家建築〉. 香港廣東客屬社團聯合總會. 喺2015年2月5號搵到.
{{cite web}}
: CS1 maint: url-status (link) - ↑ 〈福建土樓按形狀分為圓樓、方樓、五鳳樓〉. 福建土樓旅遊網. 2013年1月17號. 原著喺2016年3月7號歸檔. 喺2015年2月5號搵到.
- ↑ 33.0 33.1 〈圍村軌跡〉. 中國文化研究院. 喺2015年2月5號搵到.
- ↑ 蕭鎮平 (2013年10月15號). 〈福建土樓曾被誤認為核基地?學者稱是個美麗傳說〉. 人民網. 原著喺2020年3月16號歸檔. 喺2015年3月26號搵到.
出面網頁
編輯- 〈客家概況〉 (英文).