Oryctolagus cuniculus
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Oryctolagus cuniculus | |
---|---|
Oryctolagus cuniculus | |
Denominacions populars | |
Conello, conillo, coniello, conil
| |
Estau de conservación | |
Clasificación cientifica | |
Eukaryota | |
Animalia | |
Mammalia | |
Lagomorpha | |
Leporidae | |
Oryctolagus | |
O. cuniculus | |
Descripción | |
Oryctolagus cuniculus
Linnaeus, 1758 | |
Distribución cheografica | |
Royo = Nativa; Rosa = Introducida |
O conello,[1] conillo[1] u coniello[1] (cientificament Oryctolagus cuniculus (Linnaeus, 1758)) ye un mamifero lagomorfo natural de a Europa mediterrania y occidental y de o norte d'o Magreb, que s'ha introduciu en diferents puestos d'o mundo y que se cría en cautividat con diversos propositos.
Descripción
[editar | modificar o codigo]O conello ye un mamifero chicot de a orden d'os Lagomorpha y d'a familia d'os leporidos, que comparte con as suyas parients as liebres.
Os conillos son herbivoros, y tienen o cuerpo cubierto d'un pelache preto y lanudo, cabeza ovalada, uellos grans, y a color d'entre parda y grisa (anque en as variedaz domesticas a diversidat de colors ye muito mas ampla). Tienen as orellas largas (dica 7 cm), anque mas curtas que as d'as liebres, y una coda chiquinina. As suyas patas debanteras son mas curtas que no as zagueras, por o que cuan se desplazan o fan brincando. Mesura de 33 a 40 cm de lonchitut.
Como as suyas parients as liebres, os conellos son fundamentalment animals diurnos, anque en libertat concentran a suya actividat en as primeras horas de maitins y as zagueras de tardes. A diferencia de como fan as liebres, os conillos habitan en cados, que en aragonés reciben o nombre especifico de lorigueras,[2] a on que libran y guardan a os cachapos, que naixen ciegos y sin pelo, dica que pueden andar.
O conello domestico (O. cuniculus domesticus), se cria por o pellizo y por a carne, y a vegadas, puede servir d'animal de companyía. Tamién puet estar criau como animal de laboratorio. Existe una raza de conello domestico propia d'a Val de Chistau en periglo de desapareixer.
Zoonimia
[editar | modificar o codigo]As diferents formas como se diz a iste leporido en os idiomas iberorromanicos derivan d'un parola propia de bel pueblo prerromano d'Hispania que os griegos transcribioron como kýniklos y os romanos amproron como CUNICŬLUS en uns tiempos que esta especie yera restrinchita a la Peninsula Iberica y no la heban introducida encara en os países d'a Mediterrania Oriental. Si a evolución d'o diminutivo -ICULU ya presenta diverchencias derivatas de si a vocal I ye una Ĭ breu u una Ī larga, en o latín vulgar hispanico ista parola d'orichen no latín presentaba a forma con -ĬCULU en l'ueste y centro d'Hispania, que se convertió en coelho en portugués y conejo en castellano, y a forma -ĪCULU en l'este d'Hispania,[3] que se convertió en conill en catalán (y en occitán), tot quedando o dominio d'o navarro-aragonés entre meyo d'as dos zonas. Dende o punto d'envista teorico, a evolución de SPICULU con a parella espejo en castellano y espill en catalán presentan una distribución pareixida. En vistas d'o contexto cabe esperar que, teoricament, en aragonés a forma conello se trobe mes a sobén en aragonés occidental, y as formas conillo/conil en aragonés oriental y centro-oriental.
En o dominio lingüistico de l'aragonés, l'animal recibe diversas formas variants de o mesmo nombre. Actualment a mas frecuent ye o castellanismo «conejo»,[1] que ha gosau desplazar as parolas patrimonials aragonesas en buena cosa de l'aria aragonesofona, y que fa que se tracte d'un de os animals domesticos en os que o nombre vernaclo s'emplega menos.
D'entre os zoonimos patrimonials aragoneses, «conello» se documenta en Rodellar,[1] en o extrimo noroccidental de o Semontano de Balbastro, y en Agüero[1] en a Plana de Uesca, cuasi en a muga con as Cinco Villas. A forma conello ye muito frecuent en a scripta medieval y, con unatra ortografía, s'escribiba coneyllo en romanz navarro.
A forma «conillo» s'ha documentau en Chistén, en a val de Chistau (Sobrarbe), y en o Viello Sobrarbe[1][4] en sud de a mesma comarca, pero i ha alcordanza que s'hese emplegau, d'antigos, tamién en bellas localidaz de a val d'a Cinca, como a Buerda, y en o Toledo d'a Nata. En Torrociella d'Alcanyiz a planta Silene inflata recibe o nombre de cunillos[5]
Existe una tercera forma, «coniello», con diftongo interno. Ista forma s'ha documentau en Chistén[1] en a val de Chistau, en Vio[1] en a val de Vio, y en Broto[1] en a val de Broto; todas tres localidaz en a comarca de Sobrarbe, como en o caso anterior. Istas formas s'han feito a partir de conillo y son resultato d'hipercorreccions recients contra las formas castellanas con diminutivo en -illo, que se siente como o equivalent castellano d'o diminutivo aragonés -iello.
Formas mas minoritarias, que podrían estar localismos u mesmo catalanismos lexicos (pus nomas se troban en a metat oriental de l'Alto Aragón), son «conil», documentada en o Viello Sobrarbe por Chabier Tomás,[4] y «cunil», que se diz en Fonz.[1] As formas «conill» y «cunill», propias de a luenga catalana, trascienden en o dominio lingüistico de l'aragonés (como pasa a sobén) exclusivament en zonas en as que a pronunciación d'una -LL en posición de final no son atipicas, en lugars como Beri y Benás,[1] en a val de Benás.[1]
Se veiga tamién
[editar | modificar o codigo]Referencias
[editar | modificar o codigo]- ↑ 1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-89862-35-7
- ↑ (es) ELCOCK, William Dennis, Algunas afinidades fonéticas entre el aragonés y el bearnés (traducción de l'orichinal de 1938); Xordica Editorial. Zaragoza, 2005. ISBN 978-84-96457-09-5
- ↑ Vicente Gardía de Diego. Manual de dialectologia, espanola. Madrid: Inst. de cultura hispanica 1946. 324 S. 8°[1]
- ↑ 4,0 4,1 (es) TOMÁS ARIAS, Chabier. El aragonés del Biello Sobrarbe. Instituto de Estudios Altoaragoneses. Uesca, 1999. ISBN 84-8127-095-4
- ↑ José Pardo Sastrón Catalogo o enumeración de las plantas de Torrecilla de Alcañiz asi espontáneas como cultivadas. Tip.de E.casañal y compañía. 1895. Reedición de 1995 de lo Instituto de Estudios Turolenses.
Vinclos externos
[editar | modificar o codigo]Se veigan as imáchens de Commons sobre Oryctolagus cuniculus.