Taman Sijarah Nasional Chaco Culture
Taman Sijarah Nasional Chaco Culture | |
---|---|
Bangunan Chetro Ketl | |
[[File:|250px]] | |
Letak | San Juan County dan McKinley County, New Mexico, US |
Koordinat | 36°04′N 107°58′W / 36.06°N 107.97°WKoordinat: 36°04′N 107°58′W / 36.06°N 107.97°W |
Laweh | 33,977.8 ekars (137.50 km2) |
Arsitektur | Pueblo saisuak |
Pangunjuang | 39.175 (tahun 2011) |
Badan pangelola | Badan Taman Nasional |
Situs web | Chaco Culture National Historical Park |
Namo resmi: Chaco Culture | |
Jinih | Situs budaya |
Kriteria | iii |
Ditatapkan | 1987 (sesi ka-11) |
353 | |
Nagara | |
Kawasan | Amerika utara |
Jenis | Kawasan Sijarah di Amerika serikat |
Ditetapkan | 15 Oktober 1966 |
Taman Sijarah Nasional Chaco Culture adolah taman nasional sijarah nan barado di Amerika Serikat.[1] Taman sijarah nasional atau bisa disabuik juo jo situs sijarah nasional ko barado di Amerika bagian barat daya, labiah tapeknyo lai lataknyo di barat lauik dari negara bagian Amerika Serikat, yaitunyo New Mexico. Situs sijarah purubakala ko barado di sabuah ngarai nan tasuruak di antaro duo buah kota yaitunyo kota Albuquerque jo kota Farmington. Lokasi situs ko barisi raruntuahan baguanan kuno paninggalan budaya pado maso pra-jaman kolombia nan basijarah bagi urang-urang nan tingga di Kawasan Amerika.[2]
Sijarah
[suntiang | suntiang sumber]Urang Pueblo marupoan masyarakaik nan partamo mandiami kawasan barat daya Amerika ko pado katiko itu, nan di pakiroan ado pado antaro tahun 850 jo 1250 atau labiah kurang sakitar duo ribu taun nan lalu. Panduduak satampek manjadian kawasan di daerah ngarai Chaco ko manjadi tampek pusek bakagiatan sarupo kagiatan upacara adaik, tampek manggaleh jo bajua bali, dan tampek pamarintahan katiko itu. Sabagai pusek tampek bakagiatan, lokasi nan barado di ngaraiko tadapek bangunan-bangunan nan diparuntuakan untuak kagiatan upacara. Salain bangunan-bangunan, ado pulo monumen nan alah di bangun pado maso dahulu.[2] Pada tahun 1901, Richard Wetherill manaliti di situs purbakala ko dan manamuan sabuah rumah-rumah nan tasusun nan di bangun pado sabuah lahan nan luwehnyo sakitar 65 hektar. Panaliti lainyo, Samuel J. Holsinger manjalehan di situs sijarah tasabuik ado tadapek jalan nan bajanjang-janjang jo adonyo bendungan aia.[3] Pado tahun salanjuiknyo, paniliti dari universitas new mexico mametaan kawasan situs purbakala ko. Diantaro tahun 1920 hinggo taun 1929 dek babarapo paniliti malakukan pabaikan situs-situs di kawasanko, baik itu di barasian, di kali tanahnyo, sarato diparancak ulang baliak.[4] Pado tahun 1959 taman nasional atau situs sijarah ko alah bisa dimanfaaikan dek masyarakaik baik itu untuak wisata, bakemah, panginapan nan barado disakitar taman sijarah nasional ko. Pado tahun 1987, akhianyo taman nasional sijarah chaco culture ko ditetapkan dek UNESCO sabagai Situs Warisan Dunia.[2]
Bantangan alam
[suntiang | suntiang sumber]Taman sijarah nasional chaco culture ko barado di daratan tinggi colorado nan luweh. Kawasan ko di apik dek babarapo pagunuangan yaitunyo pagunuangan Chuska di barat, pagunuangan San Juan di subalah utara, jo pagunuangan San Pedro di subalah timua. Situs sijarah nan barado di kawasan nasional ko barado di sabuah ngarai. Ngarai ko talatak di dataran nan randah dari nan lainyo sahinggo tadapek banyak jumlah curah ujan di daerah ko. Situs sijarah ko barado kiro-kiro 1800 meter di ateh pamukaan lauik.[5]
Cagar budaya
[suntiang | suntiang sumber]Pueblo bonito
[suntiang | suntiang sumber]Pueblo bonito ko aratinyo adolah kota nan rancak. Tampek ko marupoan parumahan nan gadang pado maso lampau nan barado di taman sijarah nasional chaco culture, negara bagian New Mexico. Kota ko dibangun dek para nenek moyang panduduak satampek nan disabuek juo jo urang puebloan. Pueblo bonito marupoan salah ciek dari banyak situs cagar budaya nan di taliti dek para panaliti nan datang dari babagai negara. Manuruik saurang panaliti antropolgi nan banamo Brian Fagan mangatoan kota Pueblo Bonito iko adolah ikon arkeologi, samo disajajaran jo Stonehenge di Inggris, Teotihuacan di Meksiko, sarato jo kabudayaan Machu Picchu di negara Peru.[6][7]
Chetro ketl
[suntiang | suntiang sumber]Chetro kelt ko marupoan parumahan salanjuiknyo nan barado di kawasan taman sijarah nasional chaco culture. Bangunan ko banguan rumah nan gadang juo sarupo jo bangunan pueblo bonito. Manuruik sijarahnyo bangunan nan manyarupoi rumah nan gadang jo luweh ko marupoan tampek upacara adaik nan gadang. Salain itu, tampek ko juo marupoan tampek malakuan kagiatan-kagiatan nan pantiang nan barado di dalam masyarakai Chacoan pado maso itu. Panaliti sijarah atau arkeolog nan banamo Stephen H. Lekson mangatoan Chetro Ketl adolah sabuah istano gadang nan dihuni dek para-para bangsawan Chacoan nan bakuaso pado maso dulu. Bangunannyo di buek dek para arsitek nan pandai katiko itu nan akhianyo mambuek banguan tasabuik rancak.[7][8]
Fajada butte
[suntiang | suntiang sumber]Fajada butte ko marupoan salah ciek situs cagar budaya nan barado di kawasan taman sijarah nasional chaco culture. Jiko diliek sakileh iko indak marupoan bangunan namun labiah ka bantuak gunduakan tanah atau bukik ketek nan barado di tangah-tangah ngarai. Bukik ketek ko mampunyoi tinggi sakitar 135 meter. Namun, para paniliti katiko itu manamuan adonyo adonyo raruntuahan bangunan ketek nan barado di tabiang-tabiang bukik tasabuik. Salain itu tadapek pulo siso-siso jalan sapanjang 20 meter arah barat dari bukik ketek ko. Manuruik data-data tasabuik manunjuakan bahwasanyo Fajada butte iko marupoan tampek nan basijarah jo tampek malangsuangkan upacara-upacara nan cukuik gadang dek urang-urang bangso Chacoan katiko itu.[9]
Casa rinconada
[suntiang | suntiang sumber]Casa rincondada marupoan situs cagar budaya nan barupo bangunan nan masih barado di kawasan taman sijarah nasional chaco culture. Situs ko barado di ateh bukik nan badakekan jo situs pueblo bonito. Banguan nyo ko babantuak manyurupoi bantuak tungku. Bangunan ko dijadian tampek arena-arena patunjuakan seni katiko itu. Diliek dari bantuak bangunannyo nan malingka, ado susunan baru malingka di tai-tapi arena nan di jadian tampek duduak dek urang nan manonton pado katiko itu. Salain itu, tadapek jalan ka bawah tanah dari arena tasabuik sapanjang 12 meter. Jalan ka bawah tanah ko di jadian dek para pamain patunjuakan katiko itu untuak masuak kadalam arena atau galanggang.[9] Casa rinconada iko tamasuak kadalam banguan basijarah nan paliang gadang di kawasan ngarai chaco. Bangunan nan babantuak lingkaran ko mampunyoi panjang garih tangah sakitar 20 meter.[10]
Rujuakan
[suntiang | suntiang sumber]- ↑ "NPS Museum Collections - Chaco Culture NHS". www.nps.gov. Diakses tanggal 2020-01-13.
- ↑ a b c Centre, UNESCO World Heritage. "Chaco Culture". UNESCO World Heritage Centre (dalam bahasa Inggris). Diakses tanggal 2020-01-14.
- ↑ Hayes, Alden C.; Judge, W. James (William James) (1988). Archeological surveys of Chaco Canyon, New Mexico. Albuquerque: University of New Mexico Press. ISBN 0-8263-1029-X. OCLC 17667698. https://www.worldcat.org/oclc/17667698.
- ↑ Elliott, Melinda. (1995). Great excavations : tales of early southwestern archaeology, 1888-1939 (edisi ke-1st ed). Santa Fe, N.M.: School of American Research Press. ISBN 0-933452-42-X. OCLC 32508736. https://www.worldcat.org/oclc/32508736.
- ↑ Fagan, Brian M. (2005). Chaco Canyon : archeologists explore the lives of an ancient society. Oxford: University Press. ISBN 0-19-517043-1. OCLC 56733147. https://www.worldcat.org/oclc/56733147.
- ↑ Nageezi, Mailing Address: PO Box 220; Us, NM 87037 Phone:786-7014 Contact. "Pueblo Bonito - Chaco Culture National Historical Park (U.S. National Park Service)". www.nps.gov (dalam bahasa Inggris). Diakses tanggal 2020-01-15.
- ↑ a b Fagan, Brian M. (2005). Chaco Canyon : archeologists explore the lives of an ancient society. Oxford: University Press. ISBN 0-19-517043-1. OCLC 56733147. https://www.worldcat.org/oclc/56733147.
- ↑ "the Architecture and Dendrochronology of Chetro Kelt" (PDF). Diakses tanggal 15 Januari 2020.
- ↑ a b Lekson, Stephen H. (2007). The architecture of Chaco Canyon, New Mexico. Salt Lake City: University of Utah Press. ISBN 1-60781-789-6. OCLC 654803103. https://www.worldcat.org/oclc/654803103.
- ↑ "Casa Rinconada « Chaco Research Archive" (dalam bahasa Inggris). Diakses tanggal 2020-01-15.