Ben Leito
Fecha di nasementu | 1923 |
---|---|
Lugá di nasementu | Kòrsou |
Fecha di fayesimentu | 1996 |
Okupashon | politiko |
Funshon | Gobernador di Antia Hulandes |
Bernardito H. (Ben) Leito (☆ 6 di febrüari 1923 na Kòrsou - † sèptèmber 1996) tabata un ekonomista, topámtenar, polítiko i gobernante yu di Kòrsou. Entre 1970 i 1983 e tabata e di kuater gobernador di Antia Hulandes desde 1954. E tabata representá Antia Hulandes komo miembro di Konseho di Reino di 1987 te 1993.
Biografia
[editá | editá fuente]Ben Leito a krese na Otrobanda. Ku e edat di 15 aña el a sali pa Hulanda unda e ta kompletá su HBS na Leiden. Despues di Guera Mundial II e ta bay studia na Universidat di Tilburg, unda e ta gradua den siensia ekonómiko na 1950.
Regresando Kòrsou na 1951 Leito ta bira ámtenar na departamentu di Asuntu Sosial i Ekonomiko. E ta switch na 1953 pa servisio di finansa di Teritorio Insular di Kòrsou unda e ta bira hefe desde 1961. Na 1965 e ta wòrdu apuntá direktor di departamentu di Finansa di Antia Hulandes.[1] Den e periodo desde 1965 el a okupa tambe e puesto di presidente-komisario di Banko Sentral di Antias Hulandes (BNA) i presidente di Konseho Sosial Ekonómiko di Antia Hulandes (SER).
Karera polítiko
[editá | editá fuente]Leito tabata miembro prominente di Partido Katóliko di Pueblo (KVP), ku na 1960 a kambio nòmber pa Partido Konstruktivo di Pueblo. Na 1954 e ta debutá riba posishon nr. 3 riba lista di KVP pa e elekshon di Parlamento di Antias Hulandes, pero no ta logra atkeri asiento. Na 1955 e ta sali elegi komo miembro di Konseho Insular di Kòrsou i un aña despues ta keda apuntá lider di frakshon. Despues di retiro di Isaac Debrot, e ta reemplas'e komo miembro di Parlamento di Antias Hulandes di 1959 pa 1962. Leito a sinta hopi aña den direktiva di KVP i a okupa e funkshon di presidente di 1959 pa 1962.[2] Poniendo na disposishon di e partido su asiento den Konseho Insular e ta bandona KVP i polítika organisá fin di aña 1962.[3]
Leito tabata gezaghebber interino di Kòrsou di 1968 pa 1970 i foi 30 di desèmber 1969 gobernador interino di Antias Hulandes. Un aña despues di Trinta di Mei e ta wòrdu instalá komo e promé gobernador afro-kurasoleño den historia di Antia. Previamente mester a revoka e nombramentu di Efraïn Jonckheer komo susesor di gobernador Cola Debrot. Tanto Jonckheer komo gobièrnu antiano a bai den apelashon kontra e desishon di revokashon di gobièrnu hulandes, pero nan no a haya sosten.[4][5] Na inisio di añanan setenta di siglo binti gobièrnu hulandes bou di Joop den Uyl a trata di konvense Antia Hulandes pa tuma e kaminda pa independensia. Leito tabata kontra independensia di e islanan i a sostene e gabinete Isa-Beaujon i Evertsz den nan rechaso.[6] Na 1980 Leito ta hasi petishon pa bira miembro di Konseho di Hulanda, pero esaki ta keda nenga.[7] Siendo un di e gobernadornan ku servisio mas largu, e ta tuma retiro entrante promé di òktober 1983. Despues ku Lope Beaujon, gobernador interino, a tuma over su tareanan na mei 1983 Leito ta regresa Hulanda. Dia prome di mart 1987 e ta wordu nombra miembro di Konseho di Reino komo representante di Antia Hulandes i ta retira dia 6 di febrüari 1993 pa motivo di e yega e edat maximo.[8][9]
Leito ta fayese na september 1996 na edat di 73 aña.[10] El a kasa na 1961 ku Christine A.M. Koot i huntu nan tabatin un yu muhé i un yu hòmber.
Honor
[editá | editá fuente]Leito a risibi e siguiente kondekorashonnan:[10][11][12]
Venezuela: Krus Grandi den Orden di e Libertado (1971)
Republika Dominikano: Krus Grandi den Orden di Duarte, Sánchez i Mella (1972)
Hulanda: Ofisial den Orden di Oranje-Nassau
Hulanda: Komando den Orden di Leon Hulandes (1983)
Fuente, nota i/òf referensia
|